Fêa dou Patouè 2010 à Veulla

Plutôt que d’en parler, parlons le, et diên la rubrëcka Quinta sourta de patué que yé don ?, Lôrên de yô-lé no conte en son patué son viron devé Oûta, la Gan Veulla de la Cöltüra Arpyan-na.

Lo dessando 4 e la demendze 5 dou mèi de setembro y aveut la fêa dou patouè a Veulla en Valdouta ; aouè él bél soleil d'é volu fâre lo viadzo en passè per lo petchot Sen Bernâr ; d'é dzin regretâ, quen bél pai que d'é traversâ. En arevè a medzârt, de me seu fét payéme a mindjér per le trôpe de la « Yauta » ; apré lo pieurc, le sautisse, la tomâ, lo vin de tote le colour sens obliar la grapa, y ére l'oura de lo coloque sus le lengue e les identitè o palé réjonal,,, malérousamen, enféra tespô a cosa de la grapa, de l'é pa dzamé trovâ cho palé iquè … e d'é mancâ lo coloque ! D'en é profetâ per me promenâme dens le vi de Veulla e prendre dieus trés fotô. L'aprémedzârt passâ, de no sen-no retrovâ desât lo tradichonél chapitô per mindjér ; « cègna » tipica valdoténa onté que se te di que t'a fam en sortè de trabla t'é qu'un bujart...

Téatro en patuè

Apré éla cègna ét venu lo tens dou téatro en patouè ; comen y ére aouè « l'enfrenì » de la mort de Cerlogne lo « félibrige valdotain », l'éfola dou patouè l'at dzoya eunâ piéhe sus la via de cho gren poèto ; l'acoustica de lo chapitô en mouens, y ére un fran boun moment aouè éla tropa de téatro ; de dzouen-no, de mouens dzouen-no, de viou, de mouens viou, ol dzoyoun tou fran bien, e en patouè se vo plé ! La gnuét l'at comencha e le s'ét frenia aouè lo tradichonél bal populéro ; comen d'éro tespô las (la grapa ?), de seu alâ tsertchér lo lendeman a moun obèrje.

Messa e procechoun

La demendze matin l'at comencha aouè la messa en francèi e patouè a la catédrala de Veulla ; y aveut talamen de moundo que tou ol oun pa polu rentrar ; de seu pa arevâ a prendre de fotô deden, damadzo, y ét eunâ fran béla catédrala... A la fin de la messa, y at avou la tradichonéla procechoun de tou lo groupo en costume de lour pai, de la catédrala tenqu'a la plahe Chanoux ; y aveut la Valdouta, lo Piemoun, la Savouè, la Souisse, lo Lionèi, le Pouille, l'En e él en lo Bojolèi ! Fran bél espetaclo que s'ét freni aouè dous trés mo de remarcimè de Christiane Dunoyer, la présedenta de l'oficho de Sen Nicolà (que s'ocupe de la culture en Valdouta).

Quase mil a mindjér ensen

Y ére quase l'oura de mindjér (ma treppa le comenheut a tchamar), aloura de seu tornâ o chapitô ; apré enquéta, d'é apré que d'érion quase mil a mindjér ensen ! Deven de comenchér, d'en avou lo tradichonél discor de les autoritè réjonale de la Valdouta ; Valdouta que se plahe comen la préservachoun ma aouè l'avenir de nôra lenga ; plahe que de li baillo aouè gren plasir o vu de la sentà de so patouè.

Tou la méma lenga

Veyà ! Quase 4 oure e dzâ lo moment per me de tornar a méjoun, d'un autro câro de cho gren pai onté que de « predzen » tou la méma lenga. Y ére eunâ béla fêa dou patouè ; eunâ de mé ; de souèto qu'y en isse encorâ navriyà parére ; ma per hen y ét a nosautro lo patouèjin, los amouroù de nôra culture de prendre lo croutcho de nôro devenché per que lo soleill de les arpe ol s'amortisse pa dzamé.

Lôren de yô-lé

NDLR : Le samedi 2 octobre se tiendra l'assemblée générale de l'Institut de la Langue savoyarde dans le Chablais à Habère Lullin. C'est ouvert au public. Maintenant, la même en VO avec le mail de Lôren pour ceux, ou celles, qui seraient intéressés (par Lôren, ou bien par la langue savoyarde). 

Aouyi Patuèjan, Patuèjanne !

L’Instetù dla Linga Savoiòrda (ILS) tint pwé  son Assemblâ Jenèrala u mês d’Ôttôbro, dessando lo 02, ên la Comënna d’Aber d’Avô (Habère-Lullin) lé-eutra dèré pel’ Chablé à 9 ure.

Pe tota démanda tyé-dchu : Cette adresse email est protégée contre les robots des spammeurs, vous devez activer Javascript pour la voir.